रवि लामिछानेले अनुसन्धान अवरुद्ध गर्न खोजे : शंकर पोखरेल

२०८१ आश्विन ९, बुधबार ,प्रकाशित
अनुमानित पढ्ने समय : 2 मिनेट

नेकपा एमालेका महासचिव शंकर पोखरेलले राष्ट्रिय स्वतन्त्र पार्टी (रास्वपा)का सभापति रवि लामिछानेले सहकारी प्रकरणको अनुसन्धान नै अवरुद्ध गर्न खोजेको आरोप लगाएका छन् । तर साझेदारमध्ये एक छविलाल जोशी पक्राउ परिसकेको र उनले दिने बयानका आधारमा अनसन्धान अगाडि बढ्ने उनले बताए ।बुधबार धनगढीमा सञ्चारकर्मीहरुसँग कुरा गर्दै एमाले महासचिव पोखरेलले रास्वपा र त्यसका सभापति लामिछानेले पनि अनुसन्धानमा निःशर्त सहयोग गर्नुपर्ने बताए । ‘अनुसन्धानलाई नै रोक्ने गरी जुन प्रकारका गतिविधि भइरहेको छ, यो कानुनी राज्यमाथिको उपहास हो,’ उनले भने, ‘कुनै पनि राजनीतिक दल र नेतृत्वले अभियोग लाग्दा अनुसन्धानमा सहयोग गर्नुपर्छ ।’अभियोग कति गम्भीर छ भन्ने राष्ट्रिय स्वतन्त्र पार्टीका नेता–कार्यकर्ताले समेत बुझ्नुपर्ने उनले बताए । एउटा कम्पनी खडा गरेर टेलिभिजन सञ्चालनका लागि प्राप्त गरेको समग्र पैसा (झण्डै ६५ करोड) सहकारीमार्फत प्राप्त गरेको र सहकारीले कम्पनीमा लगानी गर्न नमिल्ने कानुन रहेको यो पक्षलाई बुझ्नुपर्छ’ पोखरेलले भने, ‘कानुन विपरीत सहकारीको पैसा ल्याएर टेलिभिजन सञ्चालन गर्नु अत्यन्त हानिकारक छ ।’‘जनताका बीचमा सुशासनका ठूला कुरा गरेर दल खडा गर्ने, आफूमाथि उठेका प्रश्नको सन्दर्भमा अनुसन्धान प्रक्रियामा जान नमान्ने कुनै अर्थमा उचित होइन’ उनले अगाडि भने ।सामाजिक सञ्जालको विकासका कारण आम सञ्चार माध्यमहरु संकटमा रहेको बेला सहकारीको रकम दुरुपयोग गरेर महत्वाकांक्षाका साथ टेलिभिजन सञ्चालन गरेको प्रष्ट भइसकेको उनले बताए । रविको नाम नलिई उनले संकटमा पुर्‍याउने व्यक्तिले म निर्दोष छु, क्लिन चिट पाएँ भनेर घोषणा गर्नु अनुचित भएको समेत बताए ।कांग्रेस र एमालेले दोषी भन्ने, रास्वपाले निर्दोष दाबी गरेको अवस्थामा अनुसन्धान कसरी अगाडि बढ्छ भन्ने सञ्चारकर्मीहरुको प्रश्नमा पोखरेलले छवि जोशीको बयान महत्वपूर्ण हुने बताए । उनले अगाडि भने, ‘यो घटनासँग सम्बन्धित एक जना साझेदार समातेर अनुसन्धानको प्रक्रियामा छ । उनले दिने रिपोर्टले धेरै कुरा तय गर्छ ।’जीबी राई फरार भएकाले उपलब्ध भएका छबिलाललाई नियन्त्रणमा लिएर अनसन्धान थालेको उनले बताए । ‘छवि जोशी, एक जना साझेदार र विचमा कुरा नमिलेपछि साझेदारीबाट बाहिरिएका व्यक्तिबाट अनुसन्धान प्रक्रिया सुरु भएको छ’ मलाई लाग्छ, त्यसले सत्य तथ्य उजागर गर्छ । त्यसैले अनुसन्धान रोकिने होइन, अझ अगाडि बढ्छ ।’

श्रोत:https://www.onlinekhabar.com/

प्रतिक्रिया दिनुहोस

सम्बन्धित समाचार

ताजा समाचार

लोकप्रिय