एक युवक पक्राउ,१३ वर्षीया बालिका बलात्कार आरोपमा
बर्दियामा १३ वर्षीया बालिका बलात्कार गरेको आरोपमा एक युवक पक्राउ परेका छन्।
बलात्कार गरेको आरोपमा प्रहरीले बारबर्दिया नगरपालिका-२ गौरिपाराका २० वर्षीय विकास थारूलाई शनिबार राति पक्राउ गरेको हो।
कक्षा ५ मा पढ्ने ती बालिकालाई विकासले शुक्रबार राति १२ बजेतिर फकाएर नजिकै खेतमा लगेर बलात्कार गरेको देखिएको इलाका प्रहरी कार्यालय बनियाभारका प्रमुख प्रहरी निरीक्षक मनि श्रेष्ठले सेतोपाटीलाई बताए।
परिवारका सबै सदस्य विवाह भोजमा व्यस्त भएको बेलामा विकासले ती बालिकामाथि बलात्कार गरेको प्रहरी निरीक्षक श्रेष्ठले बताए।
‘पीडित बालिकाले आफूमाथि भएको जबरजस्ती करणीबारे आमा र दिदीलाई भनेपछि कुरा खुलेको हो,’ उनले भने।
प्रहरीले घटनाबारे थप अनुसन्धान अघि बढाएको छ।
